WPL Title: రాయల్ ఛాలెంజర్స్ బెంగళూరు (RCB) మహిళల జట్టు మరోసారి చరిత్ర సృష్టించింది. గురువారం వడోదరలోని కోటంబి స్టేడియంలో జరిగిన మహిళల ప్రీమియర్ లీగ్ (WPL) ఫైనల్లో ఢిల్లీ క్యాపిటల్స్ను 6 వికెట్ల తేడాతో ఓడించి, రెండోసారి టైటిల్ను సొంతం చేసుకుంది. బెంగళూరు జట్టు 2024లో తొలిసారి ఛాంపియన్గా నిలవగా, ఈ విజయంతో తమ ఆధిపత్యాన్ని మరింత బలపరిచింది.
ఈ ఫైనల్ మ్యాచ్లో ఢిల్లీ క్యాపిటల్స్ తొలుత బ్యాటింగ్ చేసి భారీ స్కోరు నమోదు చేసింది. కెప్టెన్ జెమిమా రోడ్రిగ్జ్ 37 బంతుల్లో 57 పరుగులు చేసి జట్టుకు బలమైన ఆరంభం అందించింది. ఆమె ఇన్నింగ్స్లో 8 ఫోర్లు ఉన్నాయి. లారా వోల్వార్డ్ 44 పరుగులు చేయగా, షెనెల్లే హెన్రీ 35 పరుగులతో నాటౌట్గా నిలిచింది. లిజెల్లే లీ 37, షఫాలీ వర్మ 20 పరుగులతో సహకరించారు. ఈ ప్రదర్శనతో ఢిల్లీ WPL ఫైనల్ చరిత్రలోనే అత్యధిక స్కోరును నమోదు చేసింది.
WPL Title: 204 పరుగుల లక్ష్యంతో బరిలోకి దిగిన బెంగళూరు జట్టు ఆత్మవిశ్వాసంతో బ్యాటింగ్ చేసింది. కెప్టెన్ స్మృతి మంధాన అద్భుతంగా ఆడి 87 పరుగులు సాధించింది. ఆమెకు తోడుగా జార్జియా వోల్ 79 పరుగులు చేసి జట్టును విజయానికి దగ్గర చేసింది. ఈ ఇద్దరూ కలిసి 92 బంతుల్లో 165 పరుగుల భారీ భాగస్వామ్యాన్ని నెలకొల్పారు. ఇది మ్యాచ్ను పూర్తిగా బెంగళూరు వైపుకు తిప్పింది.
చివరి ఓవర్లో 10 పరుగులు అవసరమైన సమయంలో మ్యాచ్ ఉత్కంఠగా మారింది. రాధా యాదవ్, నాడిన్ డి క్లెర్క్ తొలి రెండు బంతుల్లో సింగిల్స్ తీసుకున్నారు. మూడో బంతికి రాధా యాదవ్ ఫోర్ బాదింది. నాల్గో బంతికి ఆమె కవర్ వైపు షాట్ ఆడగా, బ్యాట్ స్టంప్స్ను తాకినా బైల్స్ పడలేదు. బంతి బౌండరీ దాటడంతో బెంగళూరు విజయాన్ని ఖాయం చేసుకుంది. ఇంకా రెండు బంతులు మిగిలి ఉండగానే లక్ష్యాన్ని ఛేదించడం విశేషం. ఇది WPL ఫైనల్లోనే అత్యధిక పరుగుల ఛేదనగా నిలిచింది.
WPL Title: టోర్నమెంట్ విజేతగా నిలిచిన రాయల్ ఛాలెంజర్స్ బెంగళూరు జట్టుకు రూ.6 కోట్ల బహుమతి లభించింది. రన్నరప్గా నిలిచిన ఢిల్లీ క్యాపిటల్స్ రూ.3 కోట్లతో సరిపెట్టుకోవాల్సి వచ్చింది. ప్లేయర్ ఆఫ్ ది టోర్నమెంట్గా సోఫీ డివైన్ ఎంపికై, రూ.5 లక్షల నగదు బహుమతి అందుకున్నారు.
రెండు జట్లలోని ప్లేయింగ్ XI
RCB: స్మృతి మంధాన (కెప్టెన్), గ్రేస్ హారిస్, జార్జియా వోల్, రిచా ఘోష్ (వికెట్ కీపర్), రాధా యాదవ్, నాడిన్ డి క్లెర్క్, పూజా వస్త్రాకర్, అరుంధతి రెడ్డి, సయాలీ సత్ఘరే, శ్రేయంక పాటిల్, లారెన్ బెల్.
DC: జెమిమా రోడ్రిగ్స్ (కెప్టెన్), షఫాలీ వర్మ, లిజెల్ లీ (వికెట్ కీపర్), లారా వోల్వార్డ్ట్, మారిజానే కాప్, షెనెల్లె హెన్రీ, నికి ప్రసాద్, స్నేహ రాణా, మిన్ను మణి, శ్రీ చరణి, నందనీ శర్మ.
