– 6వ రోజు అయిన శుక్రవారం విజయవంతంగా కుంకుమార్చన కార్యక్రమం
– ఈనెల 19వ తేదీ సోమవారం రోజు 18 శక్తి పీఠాల అమ్మవార్ల అలంకరణతో చిన్నారి విద్యార్థుల ప్రదర్శన
– ప్రతి సంవత్సరం శివరాత్రి, ఉగాది, దసరా ఉత్సవాల్లో శ్రీశైల క్షేత్రం మాదిరిగా మూడుసార్లు రథోత్సవ కార్యక్రమం
– 18 శక్తి పీఠాల విశిష్టతను వివరించిన రుషిముని పండిత శ్రీ తిప్పయ్య స్వామి, నీలమ్మ మాతాజీ దంపతులు
నారాయణపేట, అక్టోబర్ 16 (జన ఉదయం ప్రతినిధి)
నియోజకవర్గ కేంద్రమైన మక్తల్ పట్టణంలో నీ శ్రీ సుక్క్షేత్ర శ్రీ మల్లికార్జున స్వామి దేవాలయ ఆవరణలో ఈ నెల 11వ తేదీ నుండి ప్రారంభమైన శరన్నవరాత్రి ఉత్సవాల్లో భాగంగా రుసుముని పండిత తిప్పయ్య స్వామి మహాసాద్వి శివ శరణి నీలమ్మ మాతాజీ ఆలయ అర్చకులు దంపతులతో దేవి శరన్నవరాత్రి ఉత్సవాలను ఆలయ ప్రాంగణంలో అంగరంగ విభంగా నిర్వహిస్తున్నారు. రెండవ సంవత్సరంగా ఆలయ ప్రాంగణంలో ఈ ప్రాంతంలో ఎక్కడ లేని విధంగా మూడు సంవత్సరాలుగా ఇట్టి కార్యక్రమాన్ని నిర్వహించాలన్న సంకల్పముతో దేవాలయ అభివృద్ధి రైతుల శ్రేయస్సు దేశ భద్రత కొనసాగించే జవాన్ల సుభిక్షం ఈ ప్రాంతం అన్ని విధాలుగా సుభిక్షంగా ఉండాలన్న సంకల్పముతో 18 శక్తి పీఠాలను నెలకొల్పుతూ నవరాత్రి ఉత్సవాల్లో భాగంగా ప్రతిరోజు సాయంత్రం 6 గంటల నుండి రాత్రి 8 గంటల వరకు వివిధ పూజ పురాణ ప్రవచనము మంగళహారతి తీర్థప్రసాదాలు వంటి కార్యక్రమాలను తిప్పయ్య స్వామి దంపతులు ఎంతో అద్భుతంగా నిర్వహించడం ఈ ప్రాంత చరిత్రలోనే ఎంతో విశేషమని చెప్పక తప్పదు. రెండవ సంవత్సరంగా 18 శక్తి పీఠాల ప్రతిష్టాపన కార్యక్రమం ఎంతో దిగ్విజయంగా వివిధ పూజలతో ఆలయ ప్రాంగణంలో నిర్వహించడాన్ని మక్తల్ పట్టణ ప్రజలు ఎంతగానో తిప్పయ్య స్వామి దంపతులను అభినందిస్తున్నారు. ఈనెల 11వ తేదీన మొట్టమొదటిగా ఆలయ ప్రాంగణంలో గణపతి స్థాపన పార్వతీ పరమేశ్వరుల స్థాపన ఆదిశక్తి అమ్మవార్ల స్థాపన సప్తమాతృకల స్థాపన తోపాటు 18 శక్తి పీఠాల స్థాపనను ఏర్పాటు చేశారు పండిత తిప్పయ్య స్వామి దంపతులు.
18 శక్తి పీఠాల యొక్క విశిష్టతను తిప్పయ్య స్వామి దంపతులు తెలియజేశారు.
18 శక్తి పీఠాల అమ్మవార్ల విశిష్టత….
పద్దెనిమిది పీఠాలు… పరాశక్తి దివ్యరూపాలు
అమ్మ ఆరాధనలో వైవిధ్యం.. అష్టాదశ క్షేత్రాల్లో ఆధ్యాత్మిక వైభవం మమతను పంచే తల్లిగా.. దుష్టశక్తులను శాసించే మహాశక్తిగా.. విద్యను ప్రసాదించే జ్ఞానదాయినిగా.. అమ్మవారి ఆరాధనలో ఎన్నెన్నో రూపాలు కనిపిస్తాయి. ఆ వైవిధ్యానికి ప్రతీకలే అష్టాదశ శక్తి పీఠాలు అంటూ వివరించారు తిప్పయ్య స్వామి దంపతులు . సతీదేవి శరీర భాగాలు పడిన ప్రదేశాలు శక్తి క్షేత్రాలుగా ఆవిర్భవించాయని పురాణ సంప్రదాయం చెబుతోందన్నారు . వాటిలో విశేష ప్రాధాన్యం పొందిన పద్దెనిమిది పీఠాలు భక్తుల ఆరాధనా కేంద్రాలుగా ప్రసిద్ధి చెందాయి. ఆయా క్షేత్రాల విశిష్టతల సమాహారమిది అంటూ వివరించారు.
1. లంకలో శాంకరీదేవి….సముద్రతీరాన శివశక్తుల సాన్నిధ్యం
శ్రీలంకలోని త్రింకోమలితో శాంకరీదేవి పీఠాన్ని అనుసంధానిస్తారు. శివుని శక్తిస్వరూపిణిగా అమ్మవారిని ఆరాధించే ఈ క్షేత్రం, దేశ సరిహద్దులకు అతీతంగా విస్తరించిన శక్తి ఉపాసనకు ప్రతీకగా నిలుస్తుంది.
2. కంచిలో కామాక్షీదేవి…కరుణకు చిరునామా
తమిళనాడులోని కాంచీపురం కామాక్షీదేవి క్షేత్రంగా ప్రసిద్ధి. అమ్మవారి కరుణామయ దృష్టి తమకు అండగా నిలుస్తుందని భక్తులు విశ్వసిస్తారు. శక్తి ఆరాధనలో కంచి పీఠానికి ప్రత్యేక స్థానం ఉంది.
3. ప్రద్యుమ్నంలో శృంఖలాదేవి…బంధవిముక్తికి ప్రతీక
శృంఖలాదేవిని ప్రద్యుమ్న క్షేత్రాధిష్ఠాన దేవతగా స్తుతిస్తారు. బంధనాల నుంచి విముక్తిని ప్రసాదించే తల్లిగా భక్తులు భావిస్తారు. ఈ పీఠాన్ని పశ్చిమ బెంగాల్‌లోని పాండువాతో అనుసంధానించే సంప్రదాయం ఉన్నప్పటికీ, ప్రాచీన స్థల నిర్ధారణపై భిన్నాభిప్రాయాలు ఉన్నాయి.
4. మైసూరులో చాముండేశ్వరీదేవి….
దుష్టసంహారిణి.. ధైర్యప్రదాయిని
కర్ణాటకలోని మైసూరు చాముండి కొండపై అమ్మవారు కొలువై ఉన్నారు. మహిషాసురమర్దినిగా ప్రసిద్ధి చెందిన చాముండేశ్వరి, చెడుపై మంచి సాధించే విజయానికి ప్రతీక. మైసూరు రాజవంశ ఆరాధ్యదేవతగా ఈ క్షేత్రం ప్రత్యేక గుర్తింపు పొందింది.
5. ఆలంపూర్‌లో జోగులాంబ…
ఉగ్రరూపంలో రక్షణభావం
తెలంగాణలోని ఆలంపూర్ జోగులాంబ అమ్మవారి క్షేత్రం. ‘యోగుల అమ్మ’గా భక్తులు కొలిచే తల్లి ఉగ్రరూపంలో దర్శనమిస్తారు. శ్రీశైలానికి పశ్చిమ ద్వారంగా పేరొందిన ఆలంపూర్ శైవ–శాక్తేయ ఆరాధనకు నిలయం.
6. శ్రీశైలంలో భ్రమరాంబిక…
జ్యోతిర్లింగంతో శక్తిపీఠ సంగమం
మల్లికార్జున స్వామి సన్నిధిలో భ్రమరాంబిక అమ్మవారు కొలువై ఉన్నారు. భ్రమర రూపంలో అరుణాసురుడిని సంహరించారన్న స్థలపురాణం ప్రసిద్ధి. జ్యోతిర్లింగం, శక్తిపీఠం ఒకే క్షేత్రంలో ఉండటం శ్రీశైల ప్రత్యేకత.
7. కొల్హాపూర్‌లో మహాలక్ష్మీదేవి….
ఐశ్వర్యంతోపాటు క్షేమానికి ఆరాధన
మహారాష్ట్రలోని కొల్హాపూర్ మహాలక్ష్మిని ‘అంబాబాయి’గా పిలుస్తారు. కరవీరపుర వాసినిగా ప్రసిద్ధి చెందిన అమ్మవారిని సంపద, కుటుంబ క్షేమం, శ్రేయస్సు కోసం భక్తులు ఆరాధిస్తారు.
8. మాహూర్‌లో ఏకవీరికాదేవి…
రేణుకామాతగా మాతృవాత్సల్యం
మహారాష్ట్రలోని మాహూర్‌లో ఏకవీరికాదేవి రేణుకామాతగా పూజలందుకుంటారు. మాతృత్వానికి ప్రతీకగా భావించే అమ్మవారి సన్నిధిని భక్తులు ఆశ్రయిస్తారు. రేణుకా ఆరాధన ఈ క్షేత్రానికి ప్రత్యేక గుర్తింపునిచ్చింది.
9. ఉజ్జయినిలో మహాకాళీదేవి…
భయాన్ని జయించే మహాశక్తి
మధ్యప్రదేశ్‌లోని ఉజ్జయిని మహాకాళి ఆరాధనకు ప్రసిద్ధి. దుష్టశక్తులను శాసించే ఉగ్రస్వరూపిణిగా అమ్మవారిని కొలుస్తారు. మహాకవి కాళిదాసుకు దేవి అనుగ్రహంతో విద్య లభించిందన్న గాథ ఈ క్షేత్ర సంప్రదాయంలో వినిపిస్తుంది.
10. పిఠాపురంలో పురుహూతికాదేవి…
ఇంద్రారాధనతో ముడిపడిన పీఠం
ఆంధ్రప్రదేశ్‌లోని పిఠాపురం కుక్కుటేశ్వర ఆలయ ప్రాంగణంలో పురుహూతికాదేవి కొలువై ఉన్నారు. ఇంద్రుడు అమ్మవారిని ఆరాధించాడని స్థలపురాణం చెబుతోంది. శివశక్తుల ఆరాధన కలగలిసిన పుణ్యక్షేత్రంగా ఇది ప్రసిద్ధి.
11. ఓఢ్యాణంలో గిరిజాదేవి…
బిరజామాతగా శక్తి వైభవం
ఒడిశాలోని జాజ్‌పూర్‌లో గిరిజాదేవి బిరజామాతగా పూజలందుకుంటారు. వైతరణీ నదితో అనుబంధం కలిగిన ఈ క్షేత్రం ‘నాభిగయ’గా ప్రసిద్ధి. మహిషాసురమర్దిని రూపంలో అమ్మవారి ఆరాధన ఇక్కడ విశేషం.
12. ద్రాక్షారామంలో మాణిక్యాంబ…
భీమేశ్వరుని సన్నిధిలో జగన్మాత
ఆంధ్రప్రదేశ్‌లోని ద్రాక్షారామంలో మాణిక్యాంబ అమ్మవారు కొలువై ఉన్నారు. పంచారామాల్లో ఒకటైన భీమేశ్వర క్షేత్రంలో శక్తిపీఠం కూడా ఉండటం విశిష్టత. శివశక్తుల అనుబంధానికి ఈ క్షేత్రం ప్రతీకగా నిలుస్తుంది.
13. హరిక్షేత్రంలో కామరూపాదేవి…
సృష్టిశక్తికి ఆరాధన
అస్సాంలోని గువాహటి సమీపాన కామాఖ్యాదేవిగా అమ్మవారు పూజలందుకుంటారు. సృష్టిశక్తికి ప్రాధాన్యమిచ్చే ఆరాధనా సంప్రదాయం ఈ క్షేత్ర ప్రత్యేకత. తంత్రోపాసనకు, ఆషాఢమాసంలో నిర్వహించే అంబుబాచి ఉత్సవానికి ప్రసిద్ధి.
14. ప్రయాగలో మాధవేశ్వరీదేవి…
సంగమ క్షేత్రంలో శక్తి ఉపాసన
ఉత్తరప్రదేశ్‌లోని ప్రయాగరాజ్‌తో మాధవేశ్వరి పీఠాన్ని అనుసంధానిస్తారు. త్రివేణీ సంగమ పవిత్రతకు అమ్మవారి ఆరాధన తోడై ఈ క్షేత్రానికి ప్రత్యేకతను చేకూర్చింది. స్థానిక అలోపీదేవి ఆలయంతో ఈ పీఠాన్ని గుర్తించే సంప్రదాయం ఉంది.
15. జ్వాలాక్షేత్రంలో వైష్ణవీదేవి…
జ్వాలలే అమ్మవారి స్వరూపం
హిమాచల్‌ప్రదేశ్‌లోని కాంగ్రా ప్రాంతంలో జ్వాలాముఖి క్షేత్రం ఉంది. ఇక్కడ విగ్రహానికి బదులుగా వెలిగే జ్వాలలను అమ్మవారి స్వరూపంగా ఆరాధిస్తారు. అష్టాదశ పీఠాల స్తోత్రంలోని ‘జ్వాలాయాం వైష్ణవీదేవి’ ప్రస్తావన ఈ క్షేత్రానికే సంబంధించినది.
16. గయలో మాంగళ్యగౌరీదేవి…
కుటుంబ మంగళానికి ప్రార్థనలు
బీహార్‌లోని గయలో మాంగళ్యగౌరి అమ్మవారు పూజలందుకుంటారు. సౌభాగ్యం, కుటుంబ శ్రేయస్సు కోరుతూ భక్తులు తల్లిని ఆరాధిస్తారు. పితృకార్యాలకు ప్రసిద్ధమైన గయలో శక్తి ఆరాధనకూ ఈ ఆలయం కేంద్రంగా నిలుస్తుంది.
17. వారణాసిలో విశాలాక్షీదేవి…
విశాలమైన కరుణకు ప్రతిరూపం
ఉత్తరప్రదేశ్‌లోని వారణాసిలో విశాలాక్షి అమ్మవారు కొలువై ఉన్నారు. కాశీ విశ్వనాథుని క్షేత్రంలో అమ్మవారి దర్శనానికి భక్తులు ప్రత్యేక ప్రాధాన్యమిస్తారు. మోక్షక్షేత్రంగా పేరొందిన కాశీలో శక్తి ఆరాధనకు ఈ సన్నిధి ప్రతీక.
18. కాశ్మీర్‌లో సరస్వతీదేవి…
జ్ఞానజ్యోతిగా శారదామాత
అష్టాదశ శక్తిపీఠాల స్తోత్రంలో కాశ్మీరంలోని సరస్వతీదేవిని స్తుతిస్తారు. శారదా సంప్రదాయంతో ముడిపడిన ఈ ఆరాధనలో విద్య, జ్ఞానం, వివేకానికి ప్రాధాన్యం ఉంది. అమ్మవారిని జ్ఞానదాయినిగా భక్తులు కొలుస్తారు.
రూపాలు వేరు.. ఆరాధ్యశక్తి ఒక్కటే
కరుణ, ధైర్యం, జ్ఞానం, మాతృత్వం, రక్షణ—అమ్మవారి విభిన్న రూపాల్లో భక్తులకు కనిపించే భావాలివి. ప్రాంతాలు, ఆచారాలు వేరైనా జగన్మాతపై విశ్వాసమే ఈ పీఠాలను కలిపే ఆధ్యాత్మిక సూత్రం. అంటూ శ్రీ రుషిముని పండిత తిప్పయ్య స్వామీజీ మహాసాద్వి శివశరణి నీలమ్మ మాతాజీలు ఆలయ అర్చక దంపతులు తెలియజేశారు.
