AP Assembly: ఆంధ్రప్రదేశ్లో స్కూల్ విద్యార్థులకు ప్రభుత్వం ఒక మంచి అవకాశం కల్పించింది. ఆంధ్రప్రదేశ్ అసెంబ్లీ(Andhra Pradesh Legislative Assembly)లో జరగనున్న బడ్జెట్ సమావేశాలను ప్రత్యక్షంగా వీక్షించే అవకాశం ఇవ్వాలని నిర్ణయించారు. ఈ నెల 11 నుంచి ప్రారంభమయ్యే అసెంబ్లీ బడ్జెట్ సమావేశాల సందర్భంగా, ప్రతిరోజూ గ్యాలరీ నుంచి 30 మంది విద్యార్థులు సభా కార్యకలాపాలను వీక్షించవచ్చని తెలిపారు. ఈ నిర్ణయాన్ని అసెంబ్లీ స్పీకర్ చింతకాయల అయ్యన్నపాత్రుడు (Chintakayala Ayyannapatrudu) తీసుకున్నారని అధికారులు వెల్లడించారు.
విద్యార్థులు అసెంబ్లీ పనితీరును ప్రత్యక్షంగా చూడటం ద్వారా శాసన వ్యవస్థపై అవగాహన పెంపొందించుకోవచ్చనే ఉద్దేశంతో ఈ అవకాశాన్ని కల్పిస్తున్నట్లు అసెంబ్లీ సెక్రటరీ జనరల్ సూర్యదేవర ప్రసన్న కుమార్ (Suryadevara Prasanna Kumar) తెలిపారు. ముఖ్యంగా చట్టసభల ప్రాధాన్యత, ప్రజాస్వామ్య వ్యవస్థలో అసెంబ్లీ పాత్ర వంటి అంశాలపై విద్యార్థుల్లో అవగాహన పెంచడమే ఈ కార్యక్రమం లక్ష్యమన్నారు.
ఈ అవకాశం పొందాలనుకునే విద్యార్థుల వివరాలను ఆయా స్కూళ్ల హెడ్మాస్టర్లు అధికారికంగా పంపాల్సి ఉంటుంది. విద్యార్థుల పేర్లు, ఆధార్ నంబర్లతో కూడిన జాబితాపై హెడ్మాస్టర్ సంతకం చేసి, స్కూల్ స్టాంప్తో అసెంబ్లీ అధికారులకు పంపించాలని సూచించారు. ఈ వివరాలను legis.passes@gmail.com కు మెయిల్ చేయాల్సి ఉంటుంది. ఏవైనా సందేహాలు ఉంటే 86324 49184, 86324 49185 నంబర్లను సంప్రదించవచ్చని అధికారులు తెలిపారు. ఒక్కో బ్యాచ్లో 30 మంది విద్యార్థులకు 45 నిమిషాల పాటు సభా కార్యకలాపాలను వీక్షించే అవకాశం కల్పిస్తారు.
ఇది కొత్త కార్యక్రమం కాదని అధికారులు గుర్తుచేశారు. గత నవంబర్లో కూడా ఏపీ ప్రభుత్వం స్కూల్ విద్యార్థులతో మాక్ అసెంబ్లీ నిర్వహించి, ప్రజాస్వామ్య ప్రక్రియపై అవగాహన కల్పించిన సంగతి తెలిసిందే. ఇప్పుడు అదే తరహాలో ప్రత్యక్ష అసెంబ్లీ వీక్షణ ద్వారా విద్యార్థులకు మరింత అనుభవం అందించాలనే ఉద్దేశంతో ఈ నిర్ణయం తీసుకున్నారు.
ఇదిలా ఉండగా, ఫిబ్రవరి 11 నుంచి అసెంబ్లీ బడ్జెట్ సమావేశాలు ప్రారంభం కానున్నాయి. అదే రోజు గవర్నర్ ఉభయ సభలనుద్దేశించి ప్రసంగిస్తారు. అనంతరం బీఏసీ (శాసనసభ వ్యవహారాల సలహా కమిటీ) సమావేశం జరగనుంది. ఈ సమావేశంలో బడ్జెట్ సమావేశాల అజెండా, అసెంబ్లీ పనిదినాలను ఖరారు చేస్తారు. ఫిబ్రవరి 14న బడ్జెట్ ప్రవేశపెట్టే అవకాశం ఉందని సమాచారం. 2026–27 ఆర్థిక సంవత్సరానికి సంబంధించిన బడ్జెట్పై ఇప్పటికే కసరత్తు జరుగుతోంది. ఆర్థిక శాఖ మంత్రి పయ్యావుల కేశవ్ శాఖలవారీగా సమీక్షలు నిర్వహిస్తూ, ప్రభుత్వ ప్రాధాన్యాలు, ఎన్నికల హామీల అమలుపై దృష్టి పెట్టినట్లు తెలుస్తోంది.
